ஆவடி அருகே பள்ளி மாணவியை கர்ப்பமாக்கிய வாலிபர் கைது

ஆவடி,

ஆவடியை அடுத்த பட்டாபிராம் பகுதியை சேர்ந்தவர் 17 வயது பள்ளி மாணவி. இவரை அதே பகுதியை சேர்ந்த முத்து என்ற சிரஞ்சீவி (வயது 23) காதலித்து வந்தார். இந்நிலையில் பள்ளி மாணவி திடீரென மாயமானார். இதனால் மகளை அவருடைய பெற்றோர் பல இடங்களில் தேடினர். அப்போது தங்கள் மகளை, சிரஞ்சீவி அழைத்து சென்று தாலி கட்டி தன் வீட்டில் வைத்து இருந்தது தெரியவந்தது.

இதையடுத்து சிரஞ்சீவி வீட்டுக்கு சென்று மகளை அவருடைய பெற்றோர் அழைத்தனர். அப்போது அவர் 4 மாத கர்ப்பமாக இருப்பதாக கூறி பெற்றோருடன் செல்ல மறுத்தார்.

இதனால் அதிர்ச்சி அடைந்த மாணவியின் பெற்றோர் இதுகுறித்து பட்டாபிராம் போலீசில் புகார் கொடுத்தனர். அதன் பேரில் போலீசார் வழக்குப்பதிந்து சிரஞ்சீவியை நேற்று கைது செய்தனர். பின்னர் திருவள்ளூர் கோர்ட்டில் அவரை ஆஜர்படுத்தி புழல் சிறையில் அடைத்தனர். மேலும் சிறுமியை பெற்றோருடன் போலீசார் அனுப்பி வைத்தனர்.