தூத்துக்குடியில் துணிகரம் வீட்டில் தனியாக இருந்த பெண்ணை தாக்கி 10 பவுன் தங்கச்சங்கிலி பறிப்பு

தூத்துக்குடி,

திருமண அழைப்பிதழ் கொடுக்க தம்பதி போல் வந்தவர்கள், வீட்டில் தனியாக இருந்த பெண்ணை தாக்கி 10 பவுன் தங்கச்சங்கிலியை பறித்து சென்று விட்டனர்.

தூத்துக்குடியில் நடந்த இந்த துணிகர சம்பவம் பற்றிய விவரம் வருமாறு:–

தூத்துக்குடி எஸ்.கே.எஸ்.ஆர். காலனியை சேர்ந்தவர் கார்த்திகேயன் (வயது 59). உப்பு விற்பனை தொழில் செய்து வருகிறார். இவருடைய மனைவி செல்வலட்சுமி (57). இவர்களுக்கு ஒரு மகன் உள்ளார். அவர் பெங்களூருவில் வேலை பார்த்து வருகிறார். நேற்று காலையில் கார்த்திகேயன் தூத்துக்குடி–பாளையங்கோட்டை ரோட்டில் உள்ள தனது அலுவலகத்துக்கு சென்று விட்டார். இதனால் வீட்டில் செல்வலட்சுமி மட்டும் தனியாக இருந்தார்.

அப்போது அவரது வீட்டுக்கு தம்பதி போல் ஆணும், பெண்ணும் வந்தனர். அவர்கள், கார்த்திகேயனை பார்க்க வேண்டும். அவரிடம் திருமண அழைப்பிதழ் கொடுக்க வேண்டும் என்று கூறினர். இதனால் செல்வலட்சுமி அவர்களை வீட்டுக்குள் அழைத்து சென்றார். அவர்களிடம் கார்த்திகேயன் அலுவலகம் சென்று உள்ளதாகவும், அவரை நேரில் பார்த்து திருமண அழைப்பிதழை கொடுத்து விடும்படியும் கூறினார். அப்போது அவர்கள் குடிப்பதற்கு தண்ணீர் கேட்டனர். இதனால் தண்ணீர் எடுக்க செல்வலட்சுமி சமையல் அறைக்கு சென்றார்.

அப்போது திடீரென்று அவர்கள் செல்வலட்சுமியின் முகத்தில் மயக்க மருந்து ஸ்பிரே அடிக்க முயன்றனர். ஆனால் அது அவரது முகத்தில் சரியாக படாததால், இருவரும் சேர்ந்து செல்வலட்சுமியை தலையில் தாக்கி அவரை கீழே தள்ளியுள்ளனர். இதில் செல்வலட்சுமி கீழே விழுந்தார். அப்போது அவரது கழுத்தில் கிடந்த 10 பவுன் தங்கச்சங்கிலியை அவர்கள் பறித்துக்கொண்டு தப்பி சென்று விட்டனர்.

இதுகுறித்து தூத்துக்குடி வடபாகம் போலீசுக்கு தகவல் தெரிவிக்கப்பட்டது. உடனே போலீசார் சம்பவ இடத்துக்கு சென்று விசாரணை நடத்தினர். மேலும் இந்த சம்பவம் குறித்து போலீசார் வழக்குப்பதிவு செய்து, தம்பதி போல் வந்த மர்மநபர்களின் உருவம் அந்த பகுதியில் உள்ள கண்காணிப்பு கேமராக்களில் பதிவாகி உள்ளதா? என்பது குறித்து ஆய்வு செய்து வருகிறார்கள். பட்டப்பகலில் நடந்த இந்த துணிகர சம்பவம் அந்த பகுதியில் பெரும் பரபரப்பை ஏற்படுத்தியது.