நாங்குநேரி அருகே பள்ளிக்கூட மாணவி, கிணற்றில் மூழ்கி சாவு தோழிகளுடன் குளிக்கச் சென்றதில் பரிதாபம்

இட்டமொழி,

நாங்குநேரி அருகே, பள்ளிக்கூட மாணவி கிணற்றில் மூழ்கி பரிதாபமாக இறந்தார்.

நெல்லை மாவட்டம் நாங்குநேரியை அடுத்த பரப்பாடி அருகே உள்ள பற்பநாதபுரத்தை சேர்ந்தவர் ஜேசுராஜன் (வயது 43). மாற்றுத்திறனாளியான இவர், அப்பகுதியில் பெட்டிக் கடை நடத்தி வருகிறார். அவருடைய மனைவி மாதா கனி (37). இவர்களுக்கு அற்புதமேரி (12) என்ற மகளும், ஞானப்பிரகாசம் (6) என்ற மகனும் உள்ளனர்.

பரப்பாடியில் உள்ள டி.டி.டி.ஏ. நடுநிலைப்பள்ளியில் அற்புதமேரி, 7–ம் வகுப்பு படித்து வந்தாள். நேற்று பள்ளிக்கூட விடுமுறையாகும். விடுமுறை நாட்களில் அற்புதமேரி தனது தோழிகளுடன், பரப்பாடி குளத்துக்கு வரும் ஓடையில் குளிக்க செல்வது வழக்கமாம்.

இந்தநிலையில் ஓடையின் அருகே உள்ள தரைமட்ட கிணற்றில் குளிக்க அற்புதமேரி ஆசைப்பட்டுள்ளாள். அதன்படி தோழிகளுடன் நேற்று மாலை 3 மணி அளவில் கிணற்றுக்கு சென்றுள்ளாள். தற்போது பெய்த மழையில் அந்த கிணற்றில் தண்ணீர் நிரம்பி உள்ளது. கிணற்றில் அற்புதமேரி மட்டும் இறங்கியுள்ளார். மற்றவர்கள் கிணற்றில் குளிக்காமல் கரையின் அருகே நின்று கொண்டிருந்தனர்.

கரையோரத்தில் நீச்சல் அடித்து குளித்த போது, எதிர்பாராதவிதமாக அற்புதமேரியின் மூக்கில் கிணற்றுச்சுவர் இடித்துள்ளது. இதில் நிலைதடுமாறிய அவர், தண்ணீரில் மூழ்க ஆரம்பித்தார். இதனை பார்த்த மற்ற தோழிகள், கூச்சலிட்டனர். இதையடுத்து அந்த வழியாக வந்தவர்கள் அதிர்ச்சி அடைந்து, இதுபற்றி நாங்குநேரி தீயணைப்பு நிலையத்துக்கும் தகவல் தெரிவித்தனர். தீயணைப்பு வீரர்கள் வருவதற்குள், அற்புதமேரி தண்ணீருக்குள் மூழ்கினார்.

தீயணைப்பு வீரர்கள் வந்து, கிணற்றுக்குள் பாதாள கரண்டி மூலம் தேடினர். அப்போது அற்புதமேரியின் உடல் சிக்கியது. இதையடுத்து உடலை மீட்டு கரைக்கு கொண்டு வந்தனர். மகளின் உடலை பார்த்து அவருடைய குடும்பத்தினர் கதறி அழுதனர். தகவல் அறிந்ததும் நாங்குநேரி போலீசார் சம்பவ இடத்துக்கு வந்தனர். அற்புதமேரியின் உடலை கைப்பற்றி, பிரேத பரிசோதனைக்காக நாங்குநேரி அரசு ஆஸ்பத்திரிக்கு அனுப்பி வைத்தனர். போலீசார் வழக்குப்பதிவு செய்து விசாரணை நடத்தினர். தோழிகளுடன் குளிக்கச் சென்றதில் நடந்த இந்த சம்பவம் அப்பகுதியில் பரிதாபத்தை ஏற்படுத்தி உள்ளது.