பலத்த மழை எதிரொலி பூண்டி ஏரியில் நீர் மட்டம் 4 அடி உயர்வு

ஊத்துக்கோட்டை,

 இந்த ஏரியில் சேமித்து வைக்கப்படும் தண்ணீரை தேவைப்படும் போது புழல் மற்றும் செம்பரம்பாக்கம் ஏரிகளுக்கு லிங்க் கால்வாய், பேபி கால்வாய்களில் திறந்துவிடப்படுவது வழக்கம்.

தென்மேற்கு பருவ மழை பொய்த்து விட்டதாலும், கோடை வெயில் காரணமாகவும் நீர் மட்டம் வெகுவாக குறைந்தது. இதன் காரணமாக லிங்க் மற்றும் பேபி கால்வாய்களில் தண்ணீர் திறப்பு ஏப்ரல் மாதம் 6–ந் தேதியுடன் நிறுத்தப்பட்டது.

அதன்பிறகு படிப்படியாக நீர் மட்டம் குறைந்து ஆகஸ்ட் மாதம் 1–ந்தேதி ஏரியின் நீர் மட்டம் 13.40 அடியாக பதிவாகியதுடன், 19 மில்லியன் கனஅடி தண்ணீர் மட்டும்தான் இருப்பில் இருந்தது.

தற்போது வடகிழக்கு பருவ மழை பெய்து வருவதால் பூண்டி ஏரிக்கு மழை நீர் வரத்து அதிகரித்து உள்ளது. நேற்று காலை 6 மணி நிலவரப்படி ஏரியில் நீர் மட்டம் 17.75 அடியாக உயர்ந்தது. 77 மில்லியன் கனஅடி தண்ணீர் இருப்பு உள்ளது. ஏரிக்கு விநாடிக்கு 107 கனஅடி வீதம் தண்ணீர் வந்து கொண்டிருந்தது. அதாவது ஏரியின் நீர்மட்டம் 4.35 அடி உயர்ந்து உள்ளது.

மழை நீடிக்க வாய்ப்பு உள்ளதாக சென்னை வானிலை ஆய்வுமையம் அறிவித்து உள்ளதால் பூண்டி ஏரியின் நீர் மட்டம் மேலும் உயர வாய்ப்பு ஏற்பட்டு உள்ளது. மழை நீர் வரத்து காரணமாக வறண்டு கிடந்த ஏரியின் மைய பகுதியில் நீர் சூழ்ந்து ‌ஷட்டர்கள் வரை நீர் தேங்கி நிற்கிறது. ஏரியின் நீர் மட்டம் 20 அடியை தொட்டால் புழல் மற்றும் செம்பரம்பாக்கம் ஏரிகளுக்கு தண்ணீர் திறப்புக்கு சாத்தியமாகும்.