ஆசிரியர்கள் பணிக்கு வராததால் பள்ளி மாணவ-மாணவிகளுக்கு பாடம் நடத்திய சேலம் கலெக்டர்

ஆத்தூர்,

சேலம் மாவட்ட கலெக்டர் ரோகிணி, ஆத்தூர் அருகே மல்லியகரையில் சாலையோரங்களில் மரக்கன்றுகள் நடும் பணியை தொடங்கி வைப்பதற்காக நேற்று காலை வந்தார். பின்னர் தம்மம்பட்டிக்கு புறப்பட்டார். அங்கு செல்லும் வழியில் கருத்தராஜாபாளையம் ஊராட்சி தொடக்கப்பள்ளி வளாகத்தில் ஜாக்டோ - ஜியோ போராட்டம் நடந்ததால் ஆசிரியர்கள் பணிக்கு வரவில்லை. இதனால் மாணவ - மாணவிகள் வகுப்புகளுக்கு வெளியே நின்று கொண்டு இருந்தனர். இதைப் பார்த்த கலெக்டர் ரோகிணி அந்த பள்ளிக்கு சென்றார். வெளியே நின்று கொண்டிருந்த மாணவ - மாணவிகளை வகுப்புகளுக்கு அழைத்து சென்று உட்கார வைத்தார். பின்னர் 5-ம் வகுப்பு மாணவ-மாணவிகளுக்கு அவர் ஆங்கில பாடம் நடத்தினார். அப்போது மாணவ - மாணவிகளின் சந்தேகங்களுக்கு அவர் பதில் அளித்தார். சிறிது நேரம் அங்கிருந்து விட்டு கலெக்டர் ரோகிணி புறப்பட்டு சென்றார்.