கந்திகுப்பம் அருகே பஸ் மோதி கூலித்தொழிலாளி பலி

பர்கூர்,

கிருஷ்ணகிரி காந்திநகர் பகுதியை சேர்ந்தவர் சிவராஜன் (வயது 44), கூலித்தொழிலாளி. இவர் சம்பவத்தன்று தனது மோட்டார்சைக்கிளில் கிருஷ்ணகிரி – திருவண்ணாமலை சாலையில் சென்று கொண்டிருந்தார். வழியில் கந்திகுப்பம் அருகே உள்ள பனகமுட்லு என்ற இடத்தில் சென்றபோது எதிரே வந்த கர்நாடக மாநில அரசு பஸ் இவர் சென்ற மோட்டார்சைக்கிள் மீது மோதியது.

இதில் தூக்கி வீசப்பட்ட சிவராஜன் பலத்த காயம் அடைந்து சம்பவ இடத்திலேயே பரிதாபமாக உயிரிழந்தார். இதைப் பார்த்த அந்த வழியாக வந்தவர்கள் இது தொடர்பாக கந்திகுப்பம் போலீசாருக்கு தகவல் தெரிவித்தனர்.

அதன்பேரில் போலீசார் சம்பவ இடத்திற்கு விரைந்து சென்றனர். பின்னர் அவர்கள் சிவராஜனின் உடலை கைப்பற்றி பிரேத பரிசோதனைக்காக கிருஷ்ணகிரி அரசு ஆஸ்பத்திரிக்கு அனுப்பி வைத்தனர். இந்த விபத்து குறித்து கந்திகுப்பம் போலீசார் வழக்குப்பதிவு செய்து விசாரணை நடத்தி வருகின்றனர்.