பெண் ஊழியருக்கு பாலியல் தொல்லை: 2 வாலிபர்கள் கைது

பெங்களூரு

பெங்களூரு பானசவாடி அருகே வசித்து வருபவர் ராணி (பெயர் மாற்றப்பட்டுள்ளது). இவர், தனியார் நிறுவனத்தில் ஊழியராக பணியாற்றி வருகிறார். ராணி, கடந்த 4–ந் தேதி இரவு பாபுசாப் பாளையா பகுதியில் நடந்து சென்றபோது, அங்கு ஸ்கூட்டரில் வந்த 2 பேர் அவருக்கு பாலியல் தொல்லை கொடுத்ததாக கூறப்படுகிறது. உடனே அவர் சத்தம் போட்டு கூச்சலிட்டார். இதனால் 2 பேரும் அங்கிருந்து தப்பி சென்று விட்டார்கள். இதுகுறித்து பானசவாடி போலீசில் ராணி புகார் செய்தார். அதன்பேரில், போலீசார் வழக்குப்பதிவு செய்து தலைமறைவாக உள்ள 2 பேரையும் தனிப்படை அமைத்து தீவிரமாக தேடி வந்தனர்.

இந்த நிலையில், தலைமறைவாக இருந்த 2 பேரையும் பானசவாடி போலீசார் கைது செய்துள்ளனர். விசாரணையில், அவர்கள் டி.ஜே.ஹள்ளியை சேர்ந்த நந்தா என்ற அமின்(வயது 23), கே.ஜி.ஹள்ளியை சேர்ந்த முபாரக் (25) என்று தெரியவந்தது. அவர்களிடம் இருந்து ஒரு ஸ்கூட்டர் பறிமுதல் செய்யப்பட்டது. கைதான 2 பேர் மீதும் பானசவாடி போலீசார் வழக்குப்பதிவு செய்து தொடர்ந்து விசாரணை நடத்தி வருகிறார்கள்.