ரெயிலில் இருந்து தவறி விழுந்து வாலிபர் பலி

நெல்லையை அடுத்த முன்னீர்பள்ளம் மருதுநகர் ரெயில்வே கேட் அருகே நேற்று அதிகாலையில் 35 வயது மதிக்கத்தக்க வாலிபர் உடல் கிடந்ததாக அந்த பகுதியாக சென்ற பொதுமக்கள் முன்னீர்பள்ளம் போலீஸ் நிலையத்தில் புகார் செய்தனர். அதன்பேரில் சப்-இன்ஸ்பெக்டர் துரை மற்றும் போலீசார் சம்பவ இடத்துக்கு சென்று பார்வையிட்டனர். பின்னர் நாகர்கோவில் ரெயில்வே போலீசாருக்கு தகவல் தெரிவித்தனர். ரெயில்வே போலீஸ் சப்-இன்ஸ்பெக்டர் ஸ்டீபன் மற்றும் போலீசார் சம்பவ இடத்துக்கு வந்து உடலை மீட்டு அரசு ஆஸ்பத்திரிக்கு அனுப்பி வைத்தனர். அவர் நேற்று முன்தினம் இரவு சென்ற குருவாயூர் எக்ஸ்பிரஸ் ரெயிலில் இருந்து தவறி விழுந்து இறந்திருக்கலாம் என போலீசார் தெரிவித்தனர். தொடர்ந்து ரெயில்வே போலீசார் வழக்குப்பதிவு செய்து அவர் யார்? எந்த ஊரை சேர்ந்தவர்? என்பது குறித்து விசாரணை நடத்தி வருகின்றனர்.