பேராசிரியையை கட்டையால் தாக்கி ஸ்கூட்டர், செல்போன் கொள்ளை

திருச்சி அண்ணா பல்கலைக்கழக பேராசிரியையை கட்டையால் தாக்கி ஸ்கூட்டர், செல்போனை கொள்ளையடித்து சென்ற வாலிபரை போலீசார் வலைவீசி தேடி வருகிறார்கள்.

பேராசிரியை

திருச்சி வ.உ.சி. சாலை கேலக்சி டவர் பகுதியில் வசித்து வருபவர் பாண்டியன். இவருடைய மனைவி சீதாலட்சுமி (வயது 53). பேராசிரியையான இவர் திருச்சி அண்ணா பல்கலைக்கழகத்தில் இ.சி.சி. துறை தலைவராக பணியாற்றி வருகிறார்.

இவர் வழக்கமாக மாலை நேரத்தில் திருச்சி கலெக்டர் அலுவலக சாலையில் உள்ள தனியார் பள்ளி அருகில் தனது ஸ்கூட்டரை நிறுத்திவிட்டு அங்குள்ள மைதானத்தில் நடை பயிற்சி செல்வாா். பின்னர் ஸ்கூட்டரை எடுத்துக்கொண்டு வீட்டுக்கு வந்துவிடுவார்.

ஸ்கூட்டர், செல்போன் கொள்ளை

அதுபோல் நேற்று முன்தினம் மாலை அவர் நடைபயிற்சி முடித்துவிட்டு வீட்டுக்கு செல்வதற்காக ஸ்கூட்டரை எடுக்க சென்றார். அப்போது, அங்கு நின்ற ஒரு வாலிபர் தான் வைத்திருந்த மரக்கட்டையால் பேராசிரியையின் தலையில் தாக்கினார்.

இதில் நிலைகுலைந்து கீழே விழுந்த அவரை, கால்களை பிடித்து இழுத்து, அருகில் இருந்த சுவரில் சாய்த்து படுக்க வைத்துவிட்டு ஸ்கூட்டர் மற்றும் செல்போனை கொள்ளையடித்துவிட்டு தப்பிச்சென்றான். இதுகுறித்து கண்டோன்மெண்ட் குற்றப்பிரிவு போலீசில் சீதாலட்சுமி புகார் செய்தார்.

வாலிபருக்கு வலைவீச்சு

அதன்பேரில் போலீஸ் இன்ஸ்பெக்டர் சிவக்குமார் தலைமையிலான போலீசார் வழக்குப்பதிவு செய்து, அந்த பகுதியில் பதிவாகி இருந்த கண்காணிப்பு கேமரா காட்சிகளை வைத்து விசாரணை நடத்தினர்.

விசாரணையில், பேராசிரியையை தாக்கி ஸ்கூட்டர், செல்போனை பறித்துச்சென்றவர் தஞ்சை மாவட்டம் திருக்காட்டுப்பள்ளி பழமனேரியை சேர்ந்த செந்தில்குமார் (32) என்பதும், தற்போது, இவர் திருச்சி காந்திமார்க்கெட் தாராநல்லூர் கீரைக்கடை பஜார் பகுதியில் வசித்து வருவதும் தெரியவந்தது. இதைத்தொடர்ந்து, தலைமறைவாக உள்ள செந்தில்குமாரை போலீசார் வலைவீசி தேடி வருகிறார்கள்.

----

Reporter : K.Eswaramoorthy_Staff Reporter Location : Trichy - Trichy