பெண் சப்-இன்ஸ்பெக்டர் பணிக்கு உடல்தகுதி தேர்வு

2-வது நாளாக பெண் சப்-இன்ஸ்பெக்டர் பணிக்கு உடல்தகுதி தேர்வு நேற்று நடைபெற்றது.

உடல் தகுதி தேர்வு

தமிழ்நாடு சீருடைப்பணியாளர்கள் தேர்வு குழுமம் சார்பில் கடந்த சில மாதங்களுக்கு முன்பு போலீஸ் சப்-இன்ஸ்பெக்டர் பணிக்கான எழுத்து தேர்வு நடைபெற்றது. இந்த தேர்வில் தேர்ச்சி பெற்ற பெண்களுக்கான சான்றிதழ் சரிபார்ப்பு மற்றும் உடல்தகுதி தேர்வு திருச்சி ஆயுதப்படை மைதானத்தில் நேற்று முன்தினம் நடைபெற்றது. இதில் 233 பேர் மட்டுமே கலந்து கொண்டனர்.

நேற்று 2-ம் கட்டமாக உடல் திறன் தேர்வான உயரம் தாண்டுதல், நீளம் தாண்டுதல், 100 மீட்டர், 200 மீட்டர் ஓட்டம், கிரிக்கெட் பந்து எறிதல் நடைபெற்றது. இதில் 100 பேர் கலந்து கொண்டனர். இந்த தேர்வை திருச்சி மத்திய மண்டல ஐ.ஜி. சந்தோஷ்குமார், டி.ஐ.ஜி. சரவணசுந்தர் ஆகியோர் நேரில் பார்வையிட்டனர்.

வீடியோவில் பதிவு

மைதானத்திற்குள் தேர்வர்கள் மட்டுமே அனுமதிக்கப்பட்டனர். தேர்வர்களின் உறவினர்கள், நண்பர்கள் உள்ளிட்ட யாரும் அனுமதிக்கப்படவில்லை. தேர்வர்கள் கொண்டு வந்த செல்போன்கள் நுழைவு பகுதியிலேயே வாங்கி வைக்கப்பட்டன. தேர்வு முழுவதும் வீடியோவில் பதிவு செய்யப்பட்டது. இந்த தேர்வையொட்டி ஆயுதப்படை மைதானத்தில் நேற்று பலத்த போலீஸ் பாதுகாப்பு போடப்பட்டு இருந்தது.