எருமப்பட்டி அருகே மோட்டார் சைக்கிள்- டேங்கர் லாரி மோதல்; பெயிண்டர் பலி

எருமப்பட்டி:

எருமப்பட்டி அருகே மோட்டார் சைக்கிள் மீது டேங்கர் லாரி மோதி பெயிண்டர் பலியானார்.

பெயிண்டர்

திருச்செங்கோடு அருகே உள்ள சித்தாராம்பாளையம் கிராமத்தை சேர்ந்த கருணாநிதி மகன் ராஜ்குமார் (வயது 33). இவர் திருச்செங்கோடு லாரி பட்டறையில் பெயிண்டராக வேலை செய்து வந்தார். இவருடைய மனைவி தீபிகா (24). இவர்களுக்கு திருமணமாகி 1½ ஆண்டுகள் ஆகிறது.

இந்த நிலையில் ராஜ்குமார் தனது மனைவி தீபிகாவை அவருடைய சொந்த ஊரான பொட்டிரெட்டிபட்டியில் விட்டு விட்டு மோட்டார் சைக்கிளில் திருச்செங்கோடு நோக்கி சென்று கொண்டிருந்தார்.

விசாரணை

அப்போது எருமப்பட்டி அருகே அலங்காநத்தம் பிரிவு பகுதியில் சென்றபோது நாமக்கல்லில் இருந்து துறையூர் நோக்கி சென்ற டேங்கர் லாரி, ராஜ்குமார் ஓட்டி சென்ற மோட்டார்சைக்கிள் மீது மோதியது. இதில் தூக்கி வீசப்பட்டு பலத்த காயம் அடைந்த ராஜ்குமார் சம்பவ இடத்திலேயே பலியானார்.

தகவல் அறிந்து சென்ற எருமப்பட்டி போலீசார் ராஜ்குமாரின் உடலை மீட்டு பிரேத பரிசோதனைக்காக நாமக்கல் அரசு ஆஸ்பத்திரிக்கு அனுப்பி வைத்தனர். மேலும் இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர்.