அண்ணா பிறந்தநாளையொட்டி மாணவ, மாணவிகளுக்கான சைக்கிள் போட்டி

தூத்துக்குடியில் அண்ணா பிறந்த நாளையொட்டி பள்ளி மாணவ, மாணவிகளுக்கான சைக்கிள் போட்டி நேற்று(வியாழக்கிழமை) நடந்தது.

சைக்கிள் போட்டி

முன்னாள் முதல்-அமைச்சர் பேரறிஞர் அண்ணா பிறந்தநாளையொட்டி பள்ளி மாணவ, மாணவிகளுக்கான சைக்கிள் போட்டி நேற்று நடந்தது. 13 வயதுக்கு உட்பட்ட மாணவர்களுக்கு 15 கிலோ மீட்டர் தூர போட்டியும், மாணவிகளுக்கு 10 கிலோ மீட்டர் தூர போட்டியும், 15 வயதுக்கு உட்பட்ட மாணவர்களுக்கு 20 கிலோ மீட்டர் தூர போட்டியும், மாணவிகளுக்கு 15 கிலோ மீட்டர் தூர போட்டியும், 17 வயதுக்கு உட்பட்ட மாணவர்களுக்கு 20 கிலோ மீட்டர் தூர போட்டியும், மாணவிகளுக்கு 15 கிலோ மீட்டர் தூர போட்டியும் நடத்தப்பட்டது.

325 பேர்

இந்த போட்டியில் மாவட்டம் முழுவதும் இருந்து மொத்தம் 325 மாணவ, மாணவிகள் கலந்து கொண்டனர். போட்டிகளை மாவட்ட வருவாய் அலுவலர் கண்ணபிரான் தொடங்கி வைத்தார்.

போட்டிகள் மாவட்ட விளையாட்டு அரங்கில் தொடங்கி ஜார்ஜ் ரோடு, பெல் ஓட்டல், ரோச் பூங்கா, பீச் ரோடு ரெயில்வே கேட், துறைமுகம் ரவுண்டானா வரை சென்று மீண்டும் மாவட்ட விளையாட்டு அரங்கத்தில் முடிவடைந்தது.

போட்டியில் முதல் மூன்று இடங்களில் வெற்றி பெற்ற மாணவ, மாணவிகளுக்கு பரிசுத்தொகையாக தலா ரூ.5 ஆயிரம், ரூ.3 ஆயிரம், ரூ.2 ஆயிரமும், 4 முதல் 10-ம் இடம் வரை வெற்றி பெற்றவர்களுக்கு தலா ரூ.250 வீதம் பரிசுத்தொகை மற்றும் சான்றிதழ் வழங்கப்பட்டது.

நிகழ்ச்சியில் மாவட்ட விளையாட்டு அலுவலர் ஜெயரத்தினராஜன், நெல்லை மண்டல முதுநிலை மேலாளர் வீரபத்ரன் மற்றும் அரசு அதிகாரிகள் கலந்து கொண்டனர்.