அறச்சலூர் அருகேமின்சாரம் தாக்கி ஊழியர் பலி

அறச்சலூர் அருகே மின்சாரம் தாக்கி மின்வாரிய ஊழியர் பலியானார்.

மின்சாரம் தாக்கியது

மொடக்குறிச்சி அருகே உள்ள வேலம்பாளையத்தை சேர்ந்தவர் குணசேகரன் (வயது 44). இவர் அவல்பூந்துறை மின்வாரிய அலுவலகத்தில் ஊழியராக வேலை பார்த்து வந்தார். இந்த நிலையில் அறச்சலூர் அருகே சோளிபாளையத்தில் உள்ள மின் கம்பத்தில் ஏற்பட்ட பழுதை சீரமைக்க சென்றார். அங்கு அவர் மின் கம்பத்தில் ஏறி பழுதை சரி செய்யும் பணியில் ஈடுபட்டார். அப்போது எதிர்பாராதவிதமாக அவரை மின்சாரம் தாக்கியது.

சாவு

இதில் அவர் மின் கம்பத்தில் இருந்து தூக்கி வீசப்பட்டு கீழே விழுந்து படுகாயம் அடைந்தார். உடனே அவரை அங்கிருந்தவர்கள் மீட்டு சிகிச்சைக்காக ஈரோடு அரசு ஆஸ்பத்திரிக்கு கொண்டு சென்றனர்.

அங்கு பரிசோதனை செய்த டாக்டர்கள் ஏற்கனவே குணசேகரன் இறந்துவிட்டதாக தெரிவித்தனர்.

இதுகுறித்து அறச்சலூர் போலீசார் வழக்குப்பதிவு செய்து விசாரணை நடத்தி வருகின்றனர்.